TBTK mitugyan sa plastic 

Bottle bins sa kalungsuran 

TAGBILARAN CITY, July 23 (PIA)—Gitugyan sa Tigum [sa mga] Bol-anon sa Tibuok Kalibutan (TBTK) ngadto sa mga kalungsuran sa Bohol ang mga Plastic Bottle Disposal Bins sa padayon adbokasya nga limpyohon ang Bohol sa mga nagkalat nga mga plastic. 

Didto atul sa ika 164 nga kasumaran sa paglain sa Bohol ug Siquijor isip lalawigan nga dili na sakop sa Sugbo, gibutyag ni Dr. Nick Lopez, kinsa maoy presidente sa TBTK nga uban sa Confederation of Boholanos in the USA ug Canada (Conbusac) ilang itugyan ngadto sa mga kalungsuran ang mga sudlanan-hiposanan sa mga plastic nga botelya aron pagtabang sa mga katawhan sa paghipos niini. 

Segun pa ni Dr. Disi Yap Alba didto sa pagtugyan nga daghan na nga mga proyekto ang TBTK, ug niing tuiga, ilang nahukman ang plastic bottle disposal bins subay usab sa paningkamot sa mga Bol-anon sa paghimo sa islang lalawigan nga gidumog sa mga turista nga luwa na sa plastic. 

Didto sa pagtugyan, gitunol sa TBTK pinaagi sa mga opisyal niini nga sila Dr. Neil Bonje ug David Fabiosa ang usa ka symbolic plastic bottle disposal bin ngadto kang League of Municipalities of the Philippines President Allen Ray Piezas sa iyang katungod nga representante sa mga mayor. 

Segun sa pagpasabut nga gipakita sa tanan pinaagi sa video presentation, gituyo og pahimo sa TBTK ang disposal bins nga sayon ra nga abrihon aron dali ra usab nga makuha sa mga tinugyanan ang natigum nga mga botelya ug sayon na lang tapokon aron ikabaligya ug irecycle. 

Sa lain nga bahin, hinay hinay na nga nagpaduol ang Bohol sa kalibutan nga wala nay gamitay sa kas-a ra gamiton nga plastic pang putos (single-use plastic). 

Sa Tagbilaran pananglitan, gisugdan na ang No-Plastic-Saturdays samtang gipangandaman na usab ang permanente nga pag-dili na sa mga malls ug grocery stores ang paggamit sa plastic nga mga sudlanan sa mga adlaw sa semana. 

Gihimo na usab sa mga pundok ang regular nga pagpamunit sa mga basura nga dili malate ilabi na sa mga kabaybayonan. 

Sa labing bag-o nga State of the Nation Address sa Presidente, matud ni Presidente Duterte nga iya na nga gisangon ngadto sa mga local nga kagamhanan ang pagseguro nga limpyo na ang mga kabaybayonan aron magpabilin ang nasud nga dugokon sa mga turista. (rahc/PIA-7/Bohol)