Temporaryong Offsite Printing Office 

sa LTO, gibuksan sa Alturas Mall 

TAGBILARAN CITY, July 9 (PIA)--Mas gipaduol pa sa Land Transportation Office (LTO) ang ilang serbisyo sa katawhan sa lalawigan sa Bohol pinaagi sa pagbukas og Temporary Offsite Printing Office (TOPO) sa ika-upat nga andana sa Alturas Mall sa dalan CPG Avenue, ning syudad sa Tagbilaran. 

Gibuksan kini sa publiko niadtong Sabado, Hulyo 7 sa alas 3:00 sa palis sa katoyuan nga mapadali ug mahapsay ang nagtipun-og nga mga backlog nga nikabat na sa 43,000 ka mga lisensyang gikinahanglang i-imprinta. 

Ang mga opisyal sa LTO sa pagpanguna ni Region 7 Director Victor Emmanuel Caindec ug Tagbilaran City Acting OIC Macario Getaruelas ug Alturas Group of Companies (ASC) general manager Marlito Uy milagda og Memorandum of Understanding nga nag-pasilitar sa pagbutang sa temporaryong offsite printing office sa maong mall nga libre sulod sa upat ka buwan. 

Gisaksihan ang maong paglagda nilang Gob. Edgar Chatto ug Tagbilaran City Mayor John Geesnell ‘Baba’ Yap II. 

Si Caindec nipasabot nga ang gidaghanon sa backlog nisaka tungod sa bag-ong kamanduan sa gobyerno sa pag-isyu og mga lisensya nga may 5 ka tuig nang validity. 

Giingong ang 5-year validity cards nanginahanglan og bag-ong sistema nga nagkinahanglan usab og dugang impormasyon ug ang LTO nagkinahanglang e-revamp ilang sistema nga analog ngadto na sa digital nga sistema. 

Kini nagpasabot og pag-recapture sa mga datos gikan sa licensed driver sama sa: vital information, biometrics, digital image ug uban pang importanteng impormasyon nga nakadugang sa paghimo sa mga bag-ong lisensya ug renewal. 

Lakip usab sa problema nga naka-ingon sa pagkalangay mao ang hinay nga internet connection nga naka-ingon sa nagkamang nga online process sa ilang buhatan. 

Apan bisan pa sa mga problema nga nasugatan sa buhatan, gipasalig ni Caindec nga ila na kining gipaningkamotan nga masulbad ug usa na sa sulosyon mao ang bag-ong gibuksang TOPO sa maong mall diin ilang gi-banabana nga mga 10,000 ka license cards ang ilang mahuman matag buwan. 

Bukas ang TOPO sa Alturas Mall sa adlaw’ng Lunes hangtod Sabado gikan alas 10 sa buntag taman alas 7 sa gabii. (ecb/PIA7-Bohol) 

Milagda og Memorandum of Understanding ang mga opisyal sa LTO sa pagpanguna ni Region 7 Director Victor Emmanuel Caindec ug Tagbilaran City Acting OIC Macario Getaruelas tali ni Alturas Group of Companies (ASC) general manager Marlito Uy nga nag-pasilitar sa pagbutang sa Temporary Offsite Printing Office (TOPO) sa 4th Floor sa Alturas Mall nga libre sulod sa upat ka buwan. Bukas kini sa adlaw’ng Lunes taman Sabado gikan alas 10 sa buntag taman alas 7 sa gabii. (ecb/PIA7-Bohol)