Nat’l ID system, balaod na 

TAGBILARAN CITY, Aug. 7 (PIA)--Gilagdaan na ni Presidente Rodrigo Duterte isip hingpit nang balaod ang Philippine Identification System (PhilSys) Act o Republic Act 11055. 

Sa usa ka yanong seremonya sa Malakanyang gihimo ang paglagda sa balaod kagahapon nga gisaksihan sa mga opisyal sa Senado ug Kamara. 

Ubos niining bag-ong balaod, usa ka ID na lamang ang angay ipakita ug dili na kinahanglan og daghan pang ID kun may transaksiyon sa gobyerno. 

Gipaabot usab nga makatabang kini aron malikayan ang ‘red tape’ ug ‘identity theft.’ 

Matud pa sa Presidente sa iyang mensahe nga gipaabot nga makuhaan ang korapsiyon pinaagi sa maong ID system nga libre lamang ang aplikasyon alang niini. 

Gipasabot usab niini nga tuyo sa maong balaod nga magbaton og usa lamang ka national identification system alang sa mas maayong transaksiyon sa mga pampubliko ug pribadong buhatan. 

Tungod niini, magbaton na og usa ka Phil. Sys Number ang tanang Filipino diin nahisulod niini ang mga mahinungdanong impormasyon sama sa pangalan, address, petsa ug lugar dis-a gipanganak, sex, civil status, signature, CRN ug petsa sa pagpagawas sa card kauban sa pinakaulahing hulagway. 

Samtang ang mga Filipino nga nagtrabaho sa ubang nasod, mahimong magpa-rehistro sa embahada o consular offices sa Pilipinas sa nasod nga ilang nahimutangan aron makuha ang ilang National ID. 

Adunay inisyal nga P2 bilyong pondo ang Philippine Identification System Act nga nahisulod sa 2018 national budget. (ecb/PIA7-Bohol)