SSS, may benepisyo nga loan

Alang sa mga miyembro niini

TAGBILARAN CITY, Bohol, August 6 (PIA)—Panahon sa kalisud, kon mahisakop sa Social Security System (SSS), may kadangpan ka na.

Sa imong tulo ka tuig o 36 ka binuwan nga hulogan isip sakop sa SSS, mahimo ka na nga makahuwam. Kini isip usa sa mga benepisyo nga bukas alang sa mga sakop nga may maayo og standing sa SSS.

Subay sa lagda sa pahuwam nga gipagawas sa SSS, mahimo nga makahuwam kadtong nakahatag na sa unom ka binuwan nga hulogan sa katapusan nga 12 ka buwan sa wala pa iduso ang iyang loan application.

Kadtong buot sa usa ka buwan nga pahuwam, nga ang kadak-on mao ang average sa katapusan nga 12 ka buwan nga monthly salary credits (MSCs), o pila man ang kantidad nga buot huwaman, kinahangalang may pundo nga 36 ka binuwan nga hulogan.

Sa lain nga bahin, kadtong buot nga mohuwam og balig duha ka buwan, o katumbas sa kaduha ka pilo sa average MSCs sa katapusang 12 buwan, kinahanglang may napundo nga igo sa 72 ka binuwan nga hatagan, segun pa sa SSS.

Kon nanarbaho, seguraduhon lang usab nga abtik ang amo sa pagposte sa binuwan nga pahat ug walay kang-a sa uban pang mga tulubagon sa SSS.

Kini nga mga pahuwam sa SSS adunay interest nga 10% matag tuig hangtud nga mabayran tanan, subay usab sa nagkagamay nga kantidad sa principal amount ug kinahanglang mabayran sulod sa duha ka tuig.

Kon human sa duha ka tuig, wala mabayri ang huwam, magpabilin nga magpakang ang interest sa outstanding nga balance hangtud nga maimpas na, dugang sa SSS.

Kon wala gyud ikabayad, ang mga wala kabayri nga huwam o kuwangang ang igbabayad, ikaltas lamang usab sa mga short term nga benepisyo (sama sa sickness/maternity), og adto tinglon sa final benefit claim (sama sa death, retirement, ug total disability) ang membro.

Gani, aron mas sayun pang masundan sa sakop sa SSS ang pahuwam, may pamaagi usab nga i-renew ang huwam kon ang nabayad, moabut na sa katunga ug minglapas na sa 50% sa loan term of payment.

Alang sa mas paspas ug mas sayon nga pagproseso sa benepisyo sa SSS ug sa pagduso sa loans, seguradoha nga kompleto, sakto ug nahimong up-to-date ang imong records sa SSS ilabi na sa benefit claims ug loan applications.

Sa pangalan pananglit, seguroha nga sakto ang First Name, Middle Name ug Last Name, Petsa sa pag-anak, Membership Classification ug satatus sa pagkasakop, kasari-an, Civil Status, Beneficiaries (asawa ug mga anak), Contact Information (sama sa Address, Mobile Number, E-mail Address ug Bank Information kon anaa.

Aron ma update ang inyong personal data, i-fill up ang Member Data Change Request (SSS Form E-4) ug iduso kini sa labing duol nga SSS branch uban sa mga dukomento nga gikinahanglan sama sa Birth Certificate, Marriage Certificate, Death Certificate nga original o certified true copy issued sa City o Municipal Civil Registrar o sa Philippine Statistics Authority o National Statistics Office.

Nipahinumdom usab ang SSS sa pagsubmitir kanunay sa original o certified true copy kon magduso sa mga gikinahanglang ID cards o documentos.

Ang tanan nga ID cards o documentos nga may hubad sa English bisan og gi-isyo sa langyaw nga kagamhanan, dawaton sa SSS. (rahc/PA-7/Bohol)