Contractual, JO mamahimo 

Na nga ipasakop sa SSS 

TAGBILARAN CITY, September 24 (PIA)—Casual ka ba, contractual o job order nga trabahante sa inyong Local Government Unit (LGU)? 

Kon mao, usa sa imong dako nga alkanse, gawas nga wala kay benepisyo nga madawdaw kon ma-ipit ka sa panahon sa kalisud, dili ka usab mahimong ipasakop sa Government Service Insurance System (GSIS). 

Apan sukwahi sa gituohan, adunay pamaagi nga makakuha kag panalipud ug tabang kon magpasakop ka sa Social Security System (SSS). 

Sumala kang Bohol Social Security System Officer in Charge Alita Basubas, dili illegal sa usa ka contractual o job order nga trabahante nga ipasakop sa lungsod sa SSS. 

Gani, dinhi sa Bohol, ang mga kalungsuran sa Maribojoc, Calape, Loboc, Ubay ug San Miguel nagpahiluna na sa pamaagi sa automatic nga pagkaltas sa sweldo sa mga contractual, aron ideresto og bayad sa binuwan nga hulogan pagpundo sa social protection. 

Lain nga duha pa ka lungsod: ang Danao ug Buenavista ang karon molagda na sa kasabutan aron pormal na nilang kapasugdan ang SSS coverage sa ilang mga empleyadong contractual ug job order. 

Subay sa Expanded SSS Self-employed Program, mahimo kini nga ipatuman sa mga contractual ug job order nga personnel nga nagtrabaho alang sa kagamhanan. 

Usa ka memorandum circular nga gikan sa Department of Interior and Local Government mipasalig nga kadtong mga empleyado nga Contractual ug Job Order Personnel mahimong ipasakop sa SSS ug ang munisipyo ang collecting agent. 

Ang DILG MC 2014-83 mipasalig nga alang sa pagpanalipud, ilabi na kaniadto nga mopalista sa SSS aron kahatagan og coverage. 

Ang mga sakop sa SSS mamahimong makakuhag panalipud gikan sa pagka-bakol, sakit, pagpanganak, katiguwangon. 

Ang trabaho na lamang sa LGU mao ang pagtudlo sa liaison officer sa SSS, pagpahimo sa mga benepisaryo nga mahisakop isip self employed aron may automatic nga hulogan sa mga butangon. 

Alang sa dugang kasayuran kabahin niini, ang mga LGUs mahimo nga makisayud gikan sa SSS nga naa sa Galeria Luisa. (rahc/PIA-7/Bohol)