14-day mandatory quarantine sa mga

mangabot nga OFWs, balikbayans, gibalik

TAGBILARAN CITY, April 19 (PIA)--Gibalik ang pagpatuman sa 14 ka adlaw nga mandatory quarantine sa mga mangole nga overseas Filipino workers (OFWs) ug mga balikbayans sa ilang pag-abot sa lalawigan.

Base kini sa Executive Order No. 24 nga gilagdaan ni Gob. Arthur Yap niadtong Biyernes, Abril 16 nga nagmando sa mga mangabot nga Bol-anon sa pagpaubos sa quarantine sa mga pasilidad sa quarantine apil na sa mga hotels o pension house.

Ang bag-ong EO epektibo dayon sa paglagda niini sa gobernador sa lalawigan.

Apan ang mga manguleng Bol-anon nga nakapaubos na sa quarantine og pila ka adlaw sa ilang port of arrival (Manila o Cebu), gi-require lamang sa pagpuyo sa mga pasilidad sa quarantine sa mga nahabiling adlaw aron makumpleto ang 14 ka adlaw sa quarantine.

Gitugotan usab ang mga local government units sa pagtugot sa “home quarantine” basta adunay bulag nga kwarto nga adunay kaugalingong restroom ug ang OFW ug balikbayan kinahanglang e-monitor sa lokal nga awtoridad sa panglawas sa panahon sa mandatory quarantine.

Ang bag-ong EO nga gilagdaan ni Gob. Yap agi og tubag sa Department of Interior and Local Government (DILG) nga nagtambag sa mga local chief executives nga repasuhon ang ilang local nga quarantine protocol kalabot sa OFWs ug ROFs aron pagseguro sa mandatory 14-day quarantine sa ilang pag-abot sa ilang lokalidad tungod na usab sa nagkadaghang kaso sa COVID-19 sa nasod. (ecb/PIA7-Bohol)

PAREHAS GA NAGKALISUD. Si Gob. Arthur Yap (2nd from left) ug City Mayor John Geesnell Yap (far left) parehas nga nag-atubang sa mga suliran sa nagkadaghan nga pagtakod sa sakit niining katapusang mga adlaw. Niini, sa sugyot sa DILG, gipabalik na sa gobernador ang pugos nga pagpatuman sa 14 ka adlaw nga kwarantina bisan pa kon mas daku nga suliran karon ang lokal transmission nga ang kina-ingnan ang mga nia na sa Bohol. (rahc/PIA-7/Bohol)