Mandatory nga pagsuot og face shield,

gibalik sa Capitol ug City Hall

TAGBILARAN CITY, April 19 (PIA)--Tungod sa nagkadaghang kaso sa coronavirus disease (COVID-19) sa lalawigan sa Bohol, ang mga empleyado ug bisita nga mosulod sa Provincial Capitol, kinahanglang magsuot nasad og balik sa face shield sugod karong adlawa, Abril 19, 2021, aron mapugngan ang pagkatap sa virus.

Sa syudad sa Tagbilaran, ang mga residente kinahanglang magsuot og face mask ug face shield kun mosulod sa city hall, sa mga buhatan sa gobyerno ug mga pampublikong merkado sa syudad.

Ang mga dili mosunod niini mag-atubang og silot nga pagka-bilanggo og hangtod unom ka buwan ug multa gikan P3,000 ngadto sa P5,000 base sa nakalatid sa ordinansa C-305.

Kaniadto, gipahamtang usab sa maong duha ka buhatan sa gobyerno ang pagsuot og face shields sa niaging tuig sa tanan nilang mga empleyado ug bisita.

Sukad Lunes sa buntag, Abril 19, 2021, ang lalawigan sa Bohol may kinatibuk-ang 2,002 ka kaso sa COVID-19 diin 446 niini ang aktibong kaso, 1,556 ang nangaayo ug 34 na ang namatay, base sa datos gikan sa Bohol Inter-Agency Task Force (BIATF).

Subra sa katunga niining gidaghanon sa kaso ang natala sa syudad sa Tagbilaran nga may 235 ka kaso. (ecb/PIA7-Bohol)

Kinahanglang full face shield ang isuot kun mosulod ang mga empleyado ug mga bisita nga mosulod sa Provincial Capitol sa lalawigan sa Bohol sugod Abril 19, 2021. (Province of Bohol photo)

Sa syudad sa Tagbilaran, ang mga residente kinahanglang magsuot og face mask ug face shield kun mosulod sa city hall, sa mga buhatan sa gobyerno ug mga pampublikong merkado sa syudad. (Tagbilaran City Government)