Dugang vaccination guidelines gipagawas sa DOH

TAGBILARAN CITY, April 15 (PIA)--Gipagawas ug giklaro sa Department of Health (DOH) ang dugang sumbanan kalabot sa COVID-19 National Deployment and Vaccination Plan.

Sa gipagawas nga Department Memorandum (DM) No. 2021-0175 sa DOH, ang mga indibidwal nga nangaayo na sa COVID-19, angay nga mabakunahan.

Dugang pa niini, ang mga wala nakadawat sa ikaduhang dose sa bakuna tungod sa rasong pang-medikal, angay moadto dayon sa ilang mga vaccination sites aron mapahigayon dayon ang rescheduling sa vaccination.

Gipasabot usab sa bag-ong guidelines nga ang mga adunay blood pressure (BP) nga 180/120 o mas taas pa, dili mabakunahan apil na usab kadtong mga adunay sintomas og organ damage.

“Other vaccine recipients with blood pressure not meeting definitions of hypertensive emergency may be vaccinated,” base sa nakalatid sa bag-ong guidelines nga gipagawas sa buhatan.

Giklaro sa DOH nga dili kinahanglan ang medical clearance gawas sa mga indibidwal nga adunay immune compromised sama sa autoimmune disease, HIV, cancer patients nga kasamtangang nagpaubos sa immunosuppressive therapy, transplant patients, may steroid treatment ug mga pasyenteng naglubog na o adunay poor prognosis.

Gipahinumduman usab sa DOH ang publiko nga ipabilin ang minimum public health standards (MPHS) bisan nabakunahan na batok sa COVID-19. (ecb/PIA7-Bohol)

Base sa bag-ong gipagawas nga sumbanan sa DOH, ang mga pasyente nga nangaayo na ug naka-kumpleto sa iyang treatment sa sakit nga COVID-19, mahimo nang magpabakuna ug dili na kinahanglang magpaabot og 90 ka adlaw sa dili pa magpabakuna. (DOH/PIA)