Ikaduha nga dose itupok

Na sugod sunod semana

TAGBILARAN CITY, Bohol, April 5, (PIA) -- Sa sunod semana, magsugod na usab ang pagpanghatag sa ikaduhang dose alang sa kompleto nga proteksyon sa mga medical frontliners nga nangalagad dinhi sa Bohol.

Kini maoy gitaho ni National Immunization Program coordinator sa Bohol Machiavelia Caliao atul sa online meeting sa Regional Vaccination Operation Center Coordinative Meeting niadtong Abril 5, 2021.

Kahinumduman nga gisugdan ang pagpanghatag sa mga bakuna sa duh aka matang sa kompanya nga naghimo niini: ang Sinovac ug ang Astrazeneca, nga pulos nagpadala sa mga hinatag nga bakuna ug dili pa kini lakip sa mga gipalit sa kagamhanan, niadtong unang semana sa Marso.

Ang ikaduha nga dose, segun pa sa mga tinubdan, ihatag human sa 21 ka adlaw, ug gani, segun pa sa mga ulahing pagtuon, mas epektibo kon malangan pa sa laing usa ka semana.

Kini usab samtang nagpadayon ang pagpang-tupok sa bakuna sa mga designated vaccination centers sa upat ka private ug public hospitals sa Bohol, bisan pa man nga gipakanaug na ang mga bakuna ngadto sa mga Rural Health Units sa kalungsuran sa Bohol, aron masugdan na usab ang local nga pagpangtupok sa panalipod sa makalilisang nga sakit.

Gihinganlan ni Caliao, kinsa usa ka nurse sa Provincial health Office ang Dr. Emilo Del Valle Memorial Hospital, Ace Medical Center, Holy Name University ug Ramiro Community Hospital nga nagpadayon na sa ilang pagpanghatag sa bakuna sa ilang mga medical frontliners, segun sa National Vaccination Action Plan.

Sa sunod semana, ikahatag na usab sa mga tinugyanan sa kasanihan ang ikaduha nga dose sa bakuna ngadto sa mga medical frontliners sa Rural Heath Units ug sa mga personahe sa PHO, segun pa sa taho.

Naduso na usab sa Bohol, matud pa ni Caliao ang listahan sa mga senior citizens ug mga hamtong nga may mga gipanghambin nga sakit, aron matan-aw sa mga tinugyanan kon unsa ang mga ikatambag kabahin sa ila na unya nga pagdawat sa bakuna.

Segun pa usab ni Dr. Shelbay Blanco sa Department of Health Region VII, kinsa maoy nagpreside sa online nga tigum, mitala ang Bohol sa 98.8 % nga coverage sa pagpangbakuna subay sa listahan sa mga modawat ug segun sa kadaghan s amga bakuna nga miabut nganhi.

Anaa usab, matud pa sa 95.4% ang consumption sa Bohol sa mga bakuna nga gipadala dinhi. (rahchiu/PIA7/Bohol)

LABING TAAS SA REHIYON. Imbes nagtutok ang mga health workers sa posibleng kakuwang sa kabubut-on sa mga Bol-anon nga pagpabakuna tungod sa way kapasikaran nga kahadlok, sila nga nia sa medical frontline mipili nga matupokan, bisan pa sa pagpanghadlok nga kini dili makaayo sa lawas. (PIA Bohol)