Usa matag adlaw namatay 

sa COVID-19 sa usa semana

TAGBILARAN CITY, Bohol April 21 (PIA) – Nagdagan sa average nga usa ka kinabuhi ang ihalin ngadto sa kamatayon matag adlaw, niining katapusang semana.

Ingon niini ka makahahadlok ang sakit nga dala sa corona virus disease (COVID) apan alang sa uban nga mga tawo, giingong ilad lamang sa katawhan.

Sugod niadtong Abril 13, 2021 o Miyerkoles sa mi-aging semana, diha pa sa 266 ang aktibo nga kaso sa COVID sa Bohol, butag nga paspas nga napadaghan sa pag-abut sa usa ka semana.

Sa pagka Abril 20, segun sa tao sa Bohol Inter Agency Task Force on the Management of Emerging Infectious Diseases sa ilang inadlaw nga tracking sa sakit, miabut na sa 424 ka kaso o 158 ka kaso nga nadugang sa miaging semana nga ihap.

Niini, mikabat sa sobra sa katunga sa 266 ka kaso sa imaging semana ang natala nga pagsaka, butang nga labing gikahingawa-an sa mga nagtuo nga angayan lamang gayud ang estriktong pagpatuman sa mga luwas ug seguro nga tamdanan aron dili na makapanakod pa ang sakit.

Gani, sa kaso sa mga namatay, gikan sa 29 ka kaso sa kamatayon o kinabuhing nakalas sukad sa Marso sa milabay nga tuig ngadto sa Abril 13 o usa ka tuig ug usa ka buwan, mikalit og sulbong ang kaso sa kamatayon ngadto sa 36, sa labing ulahing ihap Abril 20.

Gani, sa tinamban nga kwentada, gikan sa Marso 16 sa imaging tuig ngadto sa Marso 15 niining tuiga (usa ka tuig nga ihap), anaa lamang sa 23 ka kinabuhi ang nakalas sa sakit, o, 1.9 nga binuwan nga average.

Gikan sa Marso 16 niining 2021 ngadto sa Abril 20, o usa ka buwan ug upat ka adlaw, 13 na ka kinabuhi ang nakutlo tungod niining sakit.

Kini nagpamatuod nga dili gyud angayan nga magpataka lamang ang mga komunidad sa paggawas-gawas nga walay igo nga panalipod.

Segun pa sa mga tinugyanan sa kasanihan, mas delikado ang matang sa COVID nga nakasulod sa Bohol karon, kay dili kini mokanaug gikan sa usa ka panimalay hangtud dili malukop og takod ang tanan.

Nagduda ang Bohol Medical Society nga kini na ang timailhan sa pagkuyanap sa bag-ong matang sa COViD, nga hilabihan ka mananakod.

Pahimangno ni BMS president Dr. Jefferson Ong, mag-aping pinaagi sa pagsunod sa minimum health standards ug protocols kon mogawas sa panimalay, ug maneguro sa pagdis-infect sa pagbalik sa balay.

Kini usab samtang gi-estrikto na usab ang pagpatuman sa face mask ug face shield alang niadtong mosulod sa mgha pangpublikong buhatan ug mga kamerkadohan sa syudad sa Tagbilaran.

As Abril 20, 2021, 167 na ka residente sa Tagbilaran ang natakdan ug may aktibong kaso, pun-an sa 13 ka health care workers ug 32 ka Persons Under PNP Custody o mga priso. (rahchiu/PIA-7/Bohol)