Bakuna lang ang pangbatok sa

COVID-19 pandemic – Duterte

TAGBILARAN CITY, June 7 (PIA)--Padayon ang pang-awhag ni Presidente Rodrigo Roa Duterte sa katawhan nga magpabakuna na.

Sa “Resbakuna Kasangga ng Bida” campaign sa Department of Health (DOH), gitumbok ni Presidente Duterte nga ang bakuna lamang ang paagi aron mabatokan ang COVID-19 pandemic.

Gitumbok sa Presidente sa maong infomercial nga angay hinomdoman nga ang bakuna dili lamang maghatag og proteksyon sa matag usa apan apil na usab sa ilang mga minahal sa kinabuhi ilabi na ang mga adunay sakit ug mga senior citizens.

Matud pa ni Duterte nga ang partisipasyon sa “Resbakuna Kasangga ng Bida” campaign ang yawi kun gusto nato nga padayon nang mabuksan ang ekonomiya ug mabalik ang normal natong pamuyo.

Giseguro ni Presidente Duterte nga ginahimo sa gobyerno ang makaya niini aron hingpit nga maprotektahan ang katawhan batok sa sakit hangtod makalabang niniing krisis.

Sa Talk to the People on COVID-19 niadtong Mayo 31, miingon si Presidente Duterte nga ang pagpabakuna pagpamatuod usab sa pagbaton og ‘malasakit’ sa mga Pilipino sa isig ka Pilipino ilabi na karong may pandemya. (ecb/PIA7-Bohol)

Sa iyang Talk to the People on COVID-19 niadtong Mayo 31, 2021, gitumbok ni Presidente Duterte nga ang pagpabakuna pagpamatuod usab sa pagbaton og ‘malasakit’ sa mga Pilipino sa isig ka Pilipino ilabi na karong may pandemya. (PCOO)