Mga nabakunahan sa tibuok

Pilipinas, nikabat na sa 5.9M

TAGBILARAN CITY, June 7 (PIA)--Nikabat na sa 5.9 milyon ang mga Pilipinong nabakunahan na og bakuna batok coronavirus disease (COVID-19).

Base sa labing ulahing datos nga gipagawas sa National Vaccination Operation Center (NVOC) niadtong Hunyo 6, 2021, may kinatibuk-ang 5,907,255 doses sa bakuna batok COVID-19 ang na-administer na.

Nagpabilin ang Pilipinas nga ika-2 sa vaccination administration sa 10 ka nasod sa ASEAN, ika-13 gawas sa 47 ka nasod sa Asya, ug nisaka ang ranking ngadto sa ika- 32 sa 196 ka nasod sa tibuok kalibutan.

Napadayon usab sa Pilipinas ang ika-2 nga pwesto sa mga nasod sa ASEAN sa 7-day daily average of administered doses of vaccine nga may daily rate nga 112,462 doses.

Nagpabilin usab sa ikaduhang pwesto ang Pilipinas sa mga miyembrong nasod sa ASEAN sa average daily rate sukad pagsugod sa pagbakuna, nga may average nga 60,900 doses.

Nakabakuna usab ang Pilipinas og 35.9% sa ilang mga healthcare workers, senior citizens ug mga indibidwal nga may comorbidities (A1, A2, ug A3). May 1,520,788 ka mga Pilipino ang fully vaccinated na.

Ang nasod naka-administer na usab og 787,232 vaccine doses sa milabay nga 7 ka adlaw.

Kalabot niini, mipahayag si vaccine czar Kalihim Carlito Galvez Jr. nga target sa gobyerno nga mabakunahan pa ang dugang 4 hangtod 5 milyong mga Pilipino karong buwan sa Hunyo.

Matud pa usab ni Galvez nga gipaabot usab ang padayon nga pag-abot abot sa suplay sa bakuna sa Pilipinas sa mga mosunod nga adlaw.

Giingong gitakdang moabot ang 100,000 ka doses sa COVID-19 vaccine nga Sputnik-V sa Martes, Hunyo 8. Gipaabot usab nga moabot sa nasod ang 1 milyong doses sa Sinovac sa Hunyo 10.

Samtang gitakda usab nga moabot sa Pilipinas ang kapin sa 2 milyong doses sa Pfizer, nga donasyon sa Covax facility sa Hunyo 10 ug 11.

May paaboton usab nga kapin sa 2 milyong doses sa Astra Zeneca gikan sa Covax facility sa mosunod nga duha ka semana. (ecb/PIA7-Bohol)

Base sa labing ulahing datos nga gipagawas sa National Vaccination Operation Center (NVOC) niadtong Hunyo 6, 2021, may kinatibuk-ang 5,907,255 doses sa bakuna batok COVID-19 ang administer na. (PIA)