Comelec, naglusad og mobile registration app

TAGBILARAN CITY, June 16 (PIA)--Naglusad ang Commission on Elections (Comelec) og mobile registration app alang sa proseso sa voter registration.

Mahimong ma-access ang mobile app gamit ang smartphone bisan naka-offline.

Matud pa sa pahayag ni Comelec Commissioner Marlon Casquejo, unang gilusad ang Mobile Registration Form App sa syudad sa Tagum, Davao del Norte.

“The launch of the mobile app is very timely in the face of mobility restrictions brought about by COVID-19, because you will only need a smartphone to accomplish the form,” matud pa sa pahayag ni Casquejo.

Giingong makatabang kini aron makadaginot sa igahin nga oras, paningkamot ug salapi sa computer shop aron mag-download ug mag-print sa form, o personal nga mokuha og form sa lokal nga buhatan sa Comelec.

Ang QR Code makuha sa malamposong pag-accomplish sa form. Kinahanglang e-save ang QR Code sa smartphone ug inig human, mahimong mobisita sa inyong lokal nga buhatan sa Comelec aron mapa-scan ang QR Code ug alang sa pagkuha og biometrics.

Mahimong ma-download ang Mobile Registration Form App sa link nga bit.ly/MobileFormApp.

Mahimo usab kining i-share bisan offline ang smartphone pinaagi sa SHAREit o uban pang file-sharing application.

Sa panahong ma-install, mahimo nang mo-apply sa voter registration bisan dili konektado sa internet.

Sa mga mosunod nga adlaw, ilusad na ang mobile app sa pipila ka pilot areas.

Sa pagkakaronn, gigamit na ang mobile app sa mga 500 ka lungsod ug munisipalidad, apil ang National Capital Region, Cebu City ug Davao City. (ecb/PIA7-Bohol)

Mahimong ma-access ang mobile app gamit ang smartphone bisan naka-offline. Ma-download ang Mobile Registration Form App sa link nga bit.ly/MobileFormApp. (PIA)