DFA nipasidaan kalabot sa passport appointment,

document authentication scams sa social media

TAGBILARAN CITY, June 9 (PIA)--Nipasidaan ang Department of Foreign Affairs (DFA) sa publiko nga mahimo lamang ang consular services pinaagi sa official appointment systems sa buhatan.

Ang link alang sa passport applications mao ang www.passport.gov.ph/appointment samtang ang link alang sa apostille applications mao ang https://co.dfaapostiIle.ph.

Matud pa sa pahayag nga gipagawas sa DFA, ang mga senior citizen, person with disabilities, overseas Filipino worker (OFW) ug uban pang kwalipikadong indibidwal mahimong maka-set og appointment gamit ang courtesy lane facility pinaagi sa pagpadala og email sa oca.cI@dfa.gov.ph o sa email address sa pinakaduol nga consular office.

Giseguro sa DFA nga gipaningkamotan nilang makabukas og dugang appointment slots aron dili makumpromiso ang panglawas ug kaluwasan sa publiko ug sa ilang mga kawani.

Nipahinumdom ang DFA nga wala nila gigamit ang Facebook o bisan unsang social media network aron magtanyag o magkumpirmar og passport application appointments.

Giklaro usab niini nga wala nila hatagi og awtorisasyon ang bisan unsang kumpanya o indibidwal aron magtanyag o modawat og passport appointment scheduling.

Ang bisan kinsang makadawat og serbisyo sa mga dili awtorisado nga pribadong grupo o indibidwal gamit ang social media accounts ug networks, mahimong dili makakuha og tinuod nga appointment o makasugat og problema sa ilang aplikasyon, gawas pa sa dugang gasto.

Gitambagan sa DFA ang publiko nga dili tagdon ang mga tanyag gikan sa mga kumpanya o indibidwal ug gamiton lamang ang opisyal nga passport appointment system sa buhatan.

Ang mga opisyal nga account sa DFA mao ang mosunod: official website - http://dfa.gov.ph, https://consular.dfa.gov.ph/, ug http://ofwhelp.dfa.gov.ph; FB account - https://www.facebook.com/dfaphl ug https://www.facebook.com/OFWHelpPH; Twitter account - https://twitter.com/dfaphl; ug IG account - http://instagram.com/dfaphl. (ecb/PIA7-Bohol)