Mga pensyonado sa ECC

May P20k sugod Hunyo

TAGBILARAN CITY, June 9 (PIA) – Maayong balita alang sa tanang kwalipikadong mga pensyonado sa Employees Compensation Commission (ECC).

Sumala ni Labor Secretary Silvestre Bello III,“ ang P20,000 nga pinansyal nga tabang gikan sa ECC alang sa mga pensyonado sa EC isulod sa ilang mga pundo sugod karong sa buwan sa Hunyo.”

Sa report ni ECC Executive Director Stella Zipagan-Banawis ngadto sa DOLE Secretary kinsa usab maoy pangulo sa ECC, ang mga kwalipikadong mga pensyonado sa ECC dili na kinahanglang mo-aplay sa pinansyal nga tabang, kay kini maproseso sa parehas nga pamaagi sama sa pagproseso sa ilang pension sa EC.

“Ang mga pensyonado sa mga pribadong sector nga adunay labing menus sa usa ka buwan nga permanent partial disability (PPD), permanent total disability (PTD) o survivorship pension gikan sa Hunyo 1, 2020 hangtud sa Mayo 31, 2021, makabenepisyo gikan sa gihiusa nga tabang pinansyal,” dugang ni Banawis.

Si Pangulong Rodrigo Duterte mipirma sa Administrator Order No. 39, series of 2021, niadtong Abril 19.

Kini nag-aproba sa paghatag sa tabang nga ₱20,000.00 alang sa mga pensyonado sa ECC sa parehas nga publiko ug pribado nga mga sector. (John Paul Elicano/PIABohol intern)