OFWs mahimong makatrabaho

Sa Build, Build, Build Program

TAGBILARAN CITY, June 9 (PIA) — Alang sa mga Overseas Filipino Workers (OFW) nga napugos og uli ug nawad-an og trabaho, gitanyag sa goberno ang mga trabaho sa Build Build Build Program aron duna silay kasudlan nga trabaho sa ilang pag-uli nganhi.

Kahinumduman nga una na nga gipalanog ni Pangulo Rodrigo Roa Duterte ang panawagan alang sa mga ahensiya sa gobyerno nga motabang sa nanguli nga mga OFWs nga nawad-an og trabaho tungod sa pandemya nga dala sa COVID -19.

Tungod niini, si kalihim Art Tugade ug ang Departamento sa Transportasyon wala maglangan diha nga gipabuksan ang pultahan alang sa tanang OFWs nga makatrabaho sa Build, Build, Build Program sa administrasyon aron mas motulin ang pagsubay sa lainlaing mga proyekto sa insprastaktura sa tibuuk nga nasud.

Kini nga programa, dala sa DOTr, Overseas Workers Welfare Administration (OWWA), ug Department of Labor and Employment (DOLE).

Gipirmahan na ang usa ka Memorandum of Agreement (MOA) tali sa DOTr ug OWWA aron mapalig-on ang nasangpit nga inisyatiba aron usab mahimong kapun-an ang kwalipikasyon sa mga OFWs samtang may kita usab samtang ania pa sa nasud.

Ang Dotr mohatag sa OWWA sa lista sa mga bakanteng posisyon sa Build, Build, Build nga mahimong sidlan sa OFWs, samtang ang OWWA maghatag sa DOTr sa lista sa mga kwalipikadong mga OFWs nga andam nga magtrabaho sa giingon nga proyekto.

Kini usa pa pagpamatuod nga kining administasyon, wala’y bisan usa nga biyaan. (Ruffa Mae F. Evardo/PIABohol Intern)