Pilipinas nakadawat og lain’g

2.28M doses gikan sa COVAX

TAGBILARAN CITY June 11 (PIA) -- Nakadawat na usab og dugang 2.28 milyones ka dosis sa Pfizer-BioNTech nga bakuna gikan sa COVAX facility ang Pilipinas.

Ang COVAX Facility, usa ka organisasyon nga nagsiguro sa patas nga pag-access sa COVID-19 nga mga bakuna sa tanang nasud sa tibook kalibutan sa walay pagpihig.

Ang mga bakuna ihatag sa mga wala pa hingpit nga makakompleto sa bakuna ug kadtong nalakip sa priority groups A1 ngadto sa A4 sama sa mga health workers, mga katigulangan ug kadtong anaay daan nga mga sakit.

Matod ni Health Secretary Francisco T. Duque III, ang bag-ong nangabut nga bakuna gamiton alang sa mga naa sa prioridad nga mga grupo nga A1 ngadto sa A3.

Nahadlok si Sec Duque nga kon dili mabakunahan, mapuno ang mga emergency rooms, dili na magamit nga mga intensive care units ug mga higdaanan sa ospital sa sunod nga pagdagsang sa sakit.

Gi-awhag niya ang tanan nga magpabakuna para ma-proteksyonan mga kaugalingon ug sa ilang pamilya.

Bisan dako ang panginahanglan kay sa suplay sa bakuna sa kalibutan, ang COVAX facility nagpadayon sa pagpasayon sa pagpang-apud-apod niini sa mga nasod.

Nakadawat ang Pilipinas og 193,000 ka dosis sa Pfizer-BioNTech nga mga bakuna gikan sa COVAX facility, niadtong Mayo 10, 2021.

Sa dugang nga pagpadayon sa pagpangbakuna sa A1 to A3 nga grupo, niining bag-o lang, nagsugod ang Pilipinas sa pagpamakuna sa A4 priority group nga mao ang frontline essential workers sa basic sectors. (John Paul Elicano/PIABohol intern)