P38.5M nga EHAP alang sa Mabini,

Candijay, Tagbi, Panglao itugyan na

TAGBILARAN CITY, Bohol, (PIA)—Kinatibuk-an nga P38.5 milyones ang bul-og sa pundo nga ipangtugyan sa National Housing Authority (NHA) isip katapusang hugna sa mga reimbusements sa mga biktima sa bagyo nga Odette nga angayan untang nakakuhag hinabang sa kagamhanan.

Kini maoy gipadayag ni NHA Bohol chief Genesis Caesar Manalili, kinsa midugang sa pag-ingon nga ang kinatibuk-an nga kantidad alang sa hinabang sa mga biktima sa bagyo sa mga kalungsuran sa Mabini, Candijay, Tagbilaran ug Panglao.

Didto sa Kapihan sa PIA, gipasabut usab ni Manalili nga kini unta nga kantidad, madawat sa mga tawo human sa bagyo kay napailawom man kini sa Emergency Housing Assistance Program (EHAP) sa kagamhanan.

Ang EHAP, agi og abag sa mga tag-iya sa kabalayan nga naguba tungod niadtong bagyong Odette sa 2021.

Apan, nasinati ang kalangan tungod usab sa pagkalangan sa mga kalungsuran sa pagduso sa mga listahan sa mga bubong nga nabiktima sa bagyo, aron unta mahatagan og ikapaayo sa mga balay.

Human sa bagyo, daghan na nga mga Bol-anong biktima ang naningkamot nga makapaayo sa naguba nilang mga balay, samtang naglaum sa hinabang sa goberno.

Miangkon si Manalili sa kalangan, daghan na ang mga balay nga napahiuli na ug ang mga tag-iya minggamit na lamang sa ilang kaugalingon nga mga kwarta, hinungdan nga ang EHAP nga ipang-apud-apod sa upat ka mga lungsod, isipon na lamang nga reimburso sa mga nagasto niadtong pagpa-ayo sa mga kabalayan.

Tag P10 mil ang madawat sa mga tag-iya sa mga balay nga nadaut niadtong bagyong Odette, matud ni Manalili. (PIABohol)

KATAPUSANG 4 KA LUNGSOD. Dul-an sa P40M ang itunol sa NHA sa mga biktima sa bagypong Odette, kantidad nga magsilbi na nga reimburso sa mga nagasto sa mga banay diha nga ilang gipahiuli ug gipaayo ang mga balay nga naguba sa bagyong Odette. Sugdan ang pagpanghatag karong Octubre. (PIAbohol)