Planta moproseso ug

Bolanghoy sa Carmen

TAGBILARAN CITY, Bohol (PIA)— Human nahugmak ang paglaum sa mga mag-uuma nga nahaylo sa saad sa bolanghoy dihang napaun-dang ang operasyon sa planta niini sa Carmen, nabanhaw na usab kini dihang gibuksan pinagulohan ni Gob Erico Aristotle Aumentado ug Department of Agriculture ang Bohol Cassava Production, Consolidation, Processing and Marketing Enterprise dinhi.

Proyekto nga nahimugso og balik sa pagtabang sa Department of Agrarian Reform ug sa 200 ka mga mag-uuma niining benepisaryo sa Agrarian Reform Community didto, banhawon sa mga mag-uuma ug sa ilang sakop sa banay ang pagpananum sa food-grade nga bolanghoy, aron maproseso ngadto sa harina, tayobong ug binangkong diha sa nahisgutang gitukod nga planta.

ANg planta nga gitukod maoy morposeso sa bolanghoy nga paliton gikan sa mga mag-uuma, agi og ilang kapangitaan samtang katamnan ang mga yuta nga wala maugmad, ug makasuplay usab sila sa panginahanglan sa pagkaon ug sa kinahanglanon sa planta sa tuktokon nga gipabarug didto sa Sevilla.

Kahinumduman nga kaniadto, dinhi usab nga mga lugar, nananum ang mga tawo og bolanghoy alang sa planta apan nahisugamak sila sa dili maayo nga pagtipig sa mga na-ukat nga bolanghoy nga iabut sa pagkada-ut, dili na maatul og proseso, u gang kakuwang usab sa taas nga kalidad nga bolanghoy.

Niini karon nga planta, tumong nila nga makapamaligya na sa de-kalidad nga harina ug tayobong sa mga panaderia ug mga tindahan, samtang ang mga binangkong nga bolanghoy gamiton sa mga planta nga naghimo og mga tuktokon ug pagkaon sa mga hayopan.

Matud ni Gob Aumentado, sa unang tuig sa operasyon sa planta, gilantaw nga makakuha og 5 mil ka sako nga binangkong, 7 mil ka sako nga harina ug 1 ka libo ka sako nga tayobong.

Kini maugmad pa ngadto sa 20 mil ka sako nga binangkong, 30 mil ka sako nga harina ug 5 mil ka sako nga tayobong sa ikaduhang tuig niining operasyon. (PIABohol)

NABANHAW. Human namatay ang paglaum sa mga mag-uuma sa bolanghoy, nabanhaw kini human mapabarug ang planta nga moproseso sa bolanghoy ngadto sa harina, tayobong, ug binangkong gawas pa nga makahatag kinig dugang suplay sa pagkaon sa mga pamilyang Bol-anon. (PIABohol/PLGU)