BFAR mitugyan og P6.2M

Panginabuhian sa FishCORE

TAGBILARAN CITY, Bohol, (PIA)— Gitugyan sa Bureau of Fisheries and Aquatic Resources (BFAR) pinaagi sa Fisheries and Coastal Resilience (FISHCoRe) ang mga buhi-anan og bangus ug mga proyekto sa pagpamuhi og talaba, sa us aka seremonyas didto sa Bugnaw Si-e Anda, Octubre 28,2025.

Ang mga gipangtugyan sa mga kahugpungan sa mga mangingisda, gikan sa FISHCORE component nga Modern And Resilient Livelihood Investment (MARLIN) ug nagtumong sa pagpataas sa ekonomikanhong bili sa pangisdaan ug pagpamuhi og isda sa mga komunidad nga nagsalig sa dagat.

Nagtuo ang FISHCORE nga ang pagpangtugyan sa mga panginabuhi-an pinaagi sa gitumbok nga pamuhunan sa gaan nga pangisdaan, magpakunhod sa mga mausik nga kuha, pagpalapad sa aquaculture production, ug pagdugang sa mga makuha nga isda.

Si Gobernador Erico Aristotle Aumentado, kinsa mitambong sa kalihukan kauban sa mga tinugyanan sa BFAR, mga mayor ug nga sakop sa upat ka kahugpungan sa mga mananagat mibutyag nga itugyan sa mga people’s organizations sa Jagna, Guindulman, Mabini, ug Candijay ang mga panginabuhian nga nagkantidad og kapin sa P6.2 milyon.

Niduyog kita sa kalipay nga gibati karon sa atong mga mananagat, tungod kay dako kaayo kini og tabang, dili lamang Sa sektor sa pangisdaan, apan sa kinatibuk-ang ekonomiya sa atong probinsya, matud sa goberndor.

Makatabang ang MARLIN 2.1 ug ang FishCoRe project kanato nga mapalig-on pa ang pagdumala sa panagatan pinaagi sa "ecosystem-based approach to fisheries,” dugang sa gobernador.

Gipadayag sa gobernador ang balanse nga pagugmad ug ang pagpatunhay sa kalikopan nahasubay sa katuyuan sa DA-BFAR, ug niini, mapasalamaton siya sa ngalan sa Bohol ngadto sa World Bank, ug sa BFAR nga nagpatuman sa proyekto alang sa mga Bol-anong mangingisda. (PIAbohol)

BALANSE NGA PAG-UGMAD. Gipadayag ni Gob Aumentado ang lakang sa Bohol nga pagtubag sa mga panginahanglan sa kaugmaran apan dungan usab sa pagpaneguro nga kapugngan ang dili na mabawi nga kadaut sa kalikopan, nga sama sa tumong sa FISHCORE. (PIAbohol/GO)