Gob Aris mipasalig dugang

Tabang sa mga kooperatiba

TAGBILARAN CITY, Bohol, (PIA)— Gipasalig ni Gobernador Erico Aristotle Aumentado ang mas daghan pang proyekto ug mas daghan pang kooperatiba ang matabangan sa Kagamhanang Probinsyal aron sila usab makatabang sa pagpalambo sa Bohol.

Sa iyang mensahe atubangan sa 1500 ka mga sakop sa mga kooperatiba nga naorganisa sa Provincial Cooperative Development Office, ug mitimaan sa pagtak-op sa Cooperative Month sa Oktubre, si Aumentado midayeg sa kooperatiba nga lig-on nga kaabag sa kagamhanan sa pagpaugmad sa Bohol.

Sa dugay na nga panahon, nahimo na natong kaabag ang mga kooperatiba sa pagpaduol sa mga serbisyo sa gobyerno ngadto sa katawhan ug sa pagtabang sa atong mga higala nga makabaton og insaktong panginabuhian, butyag sa gobernador.

Gipakita usab sa mga kooperatiba ang gahum sa panaghiusa kung ipatigbabaw ang kaayuhan sa tanan, dili lamang ang intensyon sa mga pipila, dugang sa gobernador.

Kapin sa P30 milyones nga pundo panginabuhian ang napadagayday sa Bohol ngadto sa mga kooperatiba sa mi-aging tuig, ug niini, interesado ang usa ka opisyal sa COOP NATCO partylist kon unsay epekto niini sa kinatibuk-ang Bohol.

Si COOP NATCO Secretary General Carlito Duenas buot masayod kon ang pundo nga gibubo sa Bohol, may epekto ba nga nakita.

Hinuon, kon basehan ang pagkunhod sa kawad-on, segun sa Philippine Statistics Authority, ang kawad-on sa Bohol nakasinati og pagkunhod sa mga katuigan.

Gikan sa 19.1 poverty incidence niadtong 2021, napakunhod na ngadto sa 14.8% ang kawad-on sa mga banay sa Bohol.

Hinuon, padayon nga nag-atubang ang lalawigan sa mga hagit sama sa nagpabiling hulga sa mga kabus nga komunidad sa mga epekto sa katalagman, ang panginahanglan sa malungtaron nga kaugmaran ug ang pagbahinbahin sa kaugmaran sa tanan nga sekto sa katilingban.

Niini, nahilakip sa Bohol Program Framework on Poverty Reduction ang pagpang-organisa sa mga katawhan isip self-help nga mekanismo u gang pagmugna og mga polisiya nga magtutok sa pagpakunhod sa kawad-on gikan sa mga kabus nga banay.

Sa tema nga "United in Purpose and Action, Sharing Prosperity to Build a Better World,” matud ni Gobernador Erico Aristotle Aumentado nga kini nagpahinumdom sa dako nga gimbuhaton sa kooperatiba sa paghulma sa kaugmaon sa lalawigan pinaagi sa pag-ugmad sa mga komunidad ug kabarangayan sa lukop nga paagi aron maabut ang tanan. (PIABohol)

KAABAG SA KALAMBUAN. Gidasig ni Gob Erico Aris Aumentado ang mga kooperatiba sa Bohol tungod sa ilang pagpaningkamot nga makatampo sa kaugmaran isip kaabag sa Bohol. (PIABohol)