Hiniusang protocol sa pagsuspenso sa klase panahon

sa linog, gikauyonan sa mga mayor, DepEd, PDRRMC

TAGBILARAN CITY, Bohol (PIA--Aron maseguro ang kaluwasan ug pagkamakanunayon sa paghimog desisyon panahon sa linog, ang mga local chief executives ubos sa League of Municipalities of the Philippines (LMP) Bohol Chapter, ilang tagsa-tagsa ka local disaster risk reduction and management officers (LDRRMOs), Provincial Disaster Risk Reduction and Management Office (PDRRMO), Department of Education (DepEd), ug Phivolcs Bohol nagtakda og komon nga criteria sa pagsuspenso og klase sa panahon kun may linog.

Kini gihimo atol sa emergency coordination meeting nga gipatawag ni Gob. Erico Aristotle Aumentado niadtong Oktubre 14, sa Ceremonial Hall sa Provincial Capitol.

Matud pa ni Aumentado nga ang maong lakang nagtinguha sa pagpasiugda og maduyogon ug paghimo og desisyon pinasikad sa ebidensya sa mga lokal nga kagamhanan ug eskwelahan, pagsiguro nga ang pagsuspenso sa klase magiyahan sa datos ug dili panic.

“Mag-issue kita og Executive Order bahin niini aron lig-on ug hapsay ang atong mga pamaagi,” matud pa sa gobernador.

Atol sa tigom, gipresentar ni PPDRRMO Head Dr. Anthony Damalerio ang komon nga criteria nga gikasabotan sa LMP ug DepEd, subay sa DepEd Department Order No. 22, s. 2024, nga naghatag og nasudnong giya alang sa pagsuspenso sa klase ug pagkansela sa panahon sa natural nga kalamidad.

Ubos sa gikasabutan nga harmonized provincial framework, walay suspension sa klase, apan ang mga eskwelahan ug LGUs kinahanglang mohimo dayon og safety inspections ug assessments ubos sa intensity 4 ug paubos. Kung may makita nga mga liki o kadaot, mahimong ideklarar ang lokal nga suspensyon.

Ubos sa intensity 5, ipahigayon ang automatic assessment ug inspection sa public structures samtang ubos sa intensity 6 pataas, ipatuman ang automatic suspension sa mga klase.

Ang EO nga ipagawas ni Aumentado maoy magpormal niini nga mga guidelines alang sa tanang local government units ug national government agencies nga naglihok sa probinsiya. (ECB/PIA7-Bohol)

Aron maseguro ang kaluwasan ug pagkamakanunayon sa paghimog desisyon panahon sa linog, si Gob. Erico Aristotle Aumentado (ika-2 gikan sa tuo), nakigtagbo sa mga mayor sa Bohol, mga opisyal sa DepEd, ug sa Phivolcs Bohol aron magkasabot sa uniporme nga guidelines niadtong Oktubre 14, sa Ceremonial Hall sa Provincial Capitol sa syudad sa Tagbilaran. (Hulagway sa PGBh).