102 ka Libreng balay para sa

banay’ng kabus, napapuy-an

TAGBILARAN CITY, Bohol (PIA)—Hangtud sa katapusang adlaw sa 2025, gikan sa 2023, mikabat na sa 102 ka ka balay sa mga kabus, apan manggitinabangon nga mga Bol-anon ang natugyan ug napapuy-an sa mga angayan nga tabangan, kini sa pagpakig-alayon sa kapulisan, sa pribadong mga sector ug kagamhanan.

Pinaagi sa programang Libre nga Alagad ug Balay (LAB), gilantaw sa mga kapulisan sa Bohol nga mas mapaduol sila sa komunidad, kinsa ilang gilauman nga makaabag usab sa pagpaningkamot nga mapatunhay ang kalinaw ug kahapsay, mapugngan ang kriminalidad ug matabangan ang mga kabus nga makasugod sa ilang bag-ong kinabuhi.

Proyekto nga nga gilusad niadtong 2023 isip sukli sa mga kapolisan sa tabang sa komunidad, ang LAB nga gipasugdan ni kanhi Bohol Police Chief Lorenzo Batuan, gipadayon ni Police Colonel Patricio Degay kay nakit-an nga may daku nga ikatabang sa katawhan ug sa buhat sa mga kapulisan na usab.

Ang proyekto, manghatag og libre nga balay sa mga sulundon nga mga banay nga kabus nga wala pay kapasidad nga makapatukod og kaugalingong balay.

Pinaagi sa tinabangay sa kapulisan ug sa mga sakop niini nga nagtampohay sa dyutay nga pundo, ibanagan sa tabang sa unang banay sa Bohol ug sa mga may maayong kabubot-on, ang una nga 12 ka balay nga natugyan niadtong 2023, nahimo na nga 26 sa 2024.

Ug ang 26 ka balay sa 2024, gipilo-pilo pa kini ngadto sa 65 ka balay sa 2025, taho sa Bohol Provincial Police Office.

Karon, nahimo na nga inabagan nga inisyatiba sa PNP ug sa kagamhanang Probinsyal ug sa unang banay pinaagi sa ilang Balay sa Paglaum, milaum ang kampo Dagohoy nga mapadaghan pa ang mga Bol-anon nga banay nga nagasunod sa balaod aron mahatagan og libre nga balay. (PIAbohol)