LANDBANK ASENSO Bonds bukas na sa publiko;

Mahimong mo-invest sa kantidad nga 10K gamit ang mobile app

TAGBILARAN CITY, Bohol (PIA)--Mas gipadali na sa LANDBANK ang pag-invest human nila gibuksan sa publiko ang ASENSO Bonds nga mahimong ma-avail gikan Enero 28 hangtod sa Pebrero 6, o mas sayo depende sa demand sa merkado.

Ang maong bond issuance naghatag og oportunidad sa mga indibidwal nga mag-invest sa labing ubos nga kantidad nga ₱10,000 gamit ang LANDBANK Mobile Banking App (MBA), gawas sa LANDBANK branches.

Ang ASENSO Bonds, o Agriculture, Sustainability, Environment, and Socioeconomic Development Bonds, adunay competitive fixed coupon rate nga 5.1714% matag tuig alang sa Series B Bonds nga may 1.5-year tenor, ug 5.5615% matag tuig usab alang sa Series C Bonds nga may 3-year tenor, nga madawat matag kwarter gikan sa issue date, less withholding tax.

Matud pa ni LANDBANK President ug CEO Lynette V. Ortiz, ang ASENSO Bonds usa ka paagi aron motubo ang savings samtang makatabang sa mahinungdanong sektor sama sa agrikultura, kinaiyahan, ug pagmugna og trabaho.

Kini usa ka matang sa pamuhonan nga adunay lawom nga tinguha, tungod kay ang matag pisong ipamuhonan dinhi, direktang nagtampo sa paglambo sa tibuok nasod.

Ang ASENSO Bonds gi-disenyo aron mahimong mapahimoslan sa mas daghang Pilipino diin sa kantidad nga ₱10,000 nga minimum investment, mahimo nang mosalmot sa maong tanyag, ug increments nga ₱10,000 pagkahuman niini — mas ubos kun itandi sa kasagarang bank-issued bonds nga nagsugod sa ₱100,000 ug ₱500,000.

Daghang paagi aron maka-invest sa LANDBANK ASENSO Bonds. Usa na niini ang pinaagi sa LANDBANK MBA — nga giisip nga labing-unang in-app purchase platform alang sa corporate o bank bonds sa nasud.

Mahimong moadto sa LANDBANK branches o sa bisan asang Selling Agents aron maka-avail sa ASENSO Bonds. Tungod niini, mas gipadali, simple, ug accessible na ang pag-invest bisan asang parte sa nasud.

Alang sa mga interesadong investors nga walay LANDBANK account, mahimong magbukas og bank account online gamit ang straight-through account opening feature sa LANDBANK MBA ug direktang mag-subscribe sa ASENSO Bonds sa pinaagi sa Investments feature. Ang LANDBANK MBA mahimong ma-download nga libre sa Google Play Store, App Store, o Huawei AppGallery.

Agig pagsunod sa tema niining “Ambag Natin sa Pag-ASENSO ng Bayan,” ang mga matigom nga pondo eksklusibong igahin sa LANDBANK sa mga eligible green ug social projects nga nahisubay sa national development priorities.

Lakip na niini ang renewable energy, energy efficiency, green buildings, clean transport, sustainable water management, pollution prevention, ug mga social initiatives sama sa food security, baratong pabalay, kahimsog, edukasyon, ug pagmugna og mga trabaho.

Mahimong dugangan sa LANDBANK ang kinatibuk-ang kantidad sa bond issuance gikan sa pasiunang ₱5 bilyon aron ma-accommodate ang mas daghang investors.

Ang China Bank Capital Corporation (Chinabank Capital) ang nagsilbing Sole Issue Manager sa nahisgotang tanyag, samtang ang LANDBANK ug Chinabank Capital ang nibarog nga Selling Agents. (ECB/PIA7-Bohol)

Ang LANDBANK nagtanyag sa ilang ASENSO Bonds ngadto sa publiko sugod sa ₱10,000 lang, nga magamit pinaagi sa LANDBANK Mobile Banking App sugod Enero 28, 2026. (LBP/PIA)