LTFRB Help Desk ipahimutang sa Kapitolyo

TAGBILARAN CITY, Bohol (PIA)--Ang Land Transportation Franchising and Regulatory Board (LTFRB) Region 7 makahatag na sa ilang mga serbisyo sa mga Bol-anon pinaagi sa ilang LTFRB Help Desk matag adlaw nga Biyernes.

Gipahibalo ni LTFRB OIC Regional Director Eugenio Ibo Jr. nga sugod sa Pebrero 6, 2026, ang ilang mga serbisyo ihatod matag adlaw nga Biyernes gikan sa alas 8:00 sa buntag hangtod sa alas 5:00 sa hapon pinaagi sa LTFRB Help Desk sa ground floor sa New Provincial Capitol, pagseguro nga mas paspas ug mas daling maabot ang serbisyo alang sa transport stakeholders ug mga aplikante sa prangkisa.

Si Ibo nitambong sa Executive Committee Meeting sa Provincial Development Council (PDC) Infrastructure Development Sector nga gipatawag sa Kagamhanang Probinsyal niadtong Enero 27, 2026, sa Juanito Cambangay, Conference Room sa Kapitolyo diin gihisgotan ang mga mahinungdanong prayoridad sa imprastraktura alang sa tuig 2027.

Ang maong tigom nagtutok sa pagpalig-on sa usa ka moderno ug high-performing nga gambalay sa imprastraktura aron mapausbaw ang regional connectivity, pagpakunhod sa gasto sa logistic, ug pagpaduol sa importanteng serbisyo sa gobyerno sa mga Boholano.

Gipangunahan ni Gob. Erico Aristotle Aumentado, gitambongan usab kini nila Provincial Planning and Development Coordinator Atty. John Titus Vistal, Provincial Administrator, Asteria Caberte, 3rd District Board Member, Hon. Nathaniel Binlod, mga representante gikan sa tulo ka legislative districts sa probinsiya, ug pribadong organisasyon.

Atol sa maong tigom, gisugyot sa LTFRB-7 ang pagkuha og lote alang sa satellite office sa Bohol aron mahatagan og hingpit nga serbisyo sa buhatan ang mga Bol-anon.

Ang LTFRB, nga gimugna pinaagi sa Executive Order No. 202, mao ang nag-unang ahensya sa Pilipinas nga responsable sa pag-regulate sa pampublikong transportasyon sa yuta. Ang core functions niini naglakip sa pag-isyu og prangkisa (Certificate of Public Convenience), pagtakda sa mga ruta, pagdeterminar sa pletihan, ug pagpatuman sa safety standards sa mga bus, jeepney, taxi, ug TNVS. (ECB/PIA7-Bohol)

Nipahigayon og courtesy visit si LTFRB-7 Officer-in-Charge Regional Director Eugenio Ibo Jr. (wala) ngadto kang Gob. Eriso Aristotle Aumentado (tunga) niadtong Enero 27, 2026, aron pormal nga ipaabot ang pasalamat sa suporta ug pakigtambayayong sa probinsiya sa pagpaduol sa mga serbisyo sa LTFRB ngadto sa katawhan. Sugod sa Pebrero 6, 2026, ang LTFRB Mobile Franchising Unit mag-operate kada semana sa Kapitolyo, matag Biyernes gikan sa alas 8:00 sa buntag hangtod sa alas 5:00 sa hapon. (PiMO photo)