Gawas sa dialogs,kapanginabuhian

Joint SP Committee: Magbutang og PNP,

Maritime Police, PCG station sa Malingin

TAGBILARAN CITY, Bohol (PIA)—Mirekomendar ang hiniusang komitiba sa Sangguniang Panlalawigan (SP) sa mga ahensya nga may kalambigitan sa pagpahiluna sa mga lakang aron hingpit na nga mapa-undang ang illegal nga panagat sa isla nga Barangay sa Malingin sa Bien Unido.

Didto sa hiniusang tigum sa SP Committees on Environment ug Peace and Order, gituki sa duha ka komitiba ang hangyo ni kanhi Mayor sa Carlos P. Garcia (CPG) ug karon Board member Fernando Estavilla nga tukion ang mga polisiya ug mga buslot sa pagpatuman sa balaod sa kadagatan.

Kini human ang pagpatuman sa balod, mingresulta sa kamatayon sa imaging tuig, duha ka mangingisda nga taga Malingin.

Matud ni Bokal Estavilla, sukad sa tuig 2016 hangtud sa 2025, 888 na ka mga mangingisda ang nadakpan ug nakasakmit na ang CPG sa kapin sa 300 ka bangka nga gigamit sa illegal nga panagat nga liba-liba.

Ang liba-liba usa ka paagi sa panagat gamit ang murag tinustos nga pukot nga may pako-pako ug may pangbugaw sa isda ngadto sa bulsabulsa niini.

Natumbok na kini nga matang sa panagat nga illegal segun sa Section 92 sa Philippine Fisheries Code of 1998, kay kini modaro sa mga gasang ug kalusayan nga mga mahinungdanon nga itloganan sa mga isda.

Giangkon usab ni Kapitan Arne Nillas sa isla sa Malingin nga daghang libaliba sa iyang barangay apan wala siya’y ikabatok niini tungod sa kakuwang sa kahinguhaan ug kawalay suporta.

Dinhi, isip Environment Committee chair, gipasabut ni Board Member Jiselle Rae Villamor, ang panginahanglang masabtan sa komunidad ang isyu aron molampus sa pagpatuman sa balaod.

Gidason usab niya ang pagpakig-lambigit sa mga katawhan aron ilang masayran ang dautang epekto sa nahisgutang panagat, gawas pa sa pagpahimutang sa laing kapilian nga panginabuhian aron ikahulip sa libaliba.

Nunot niini, usa ka resolusyon ang gipasupot sa duha ka komitiba: paghangyo sa Philippine National Police (PNP), Bohol Maritime Police Station (MARPSTA), ug Philippine Coast Guard (PCG) pagpahimutang og estasyonan sa isla nga Barangay sa Malingin, Bien Unido, Bohol, aron mapalig-on ug mahiusa na ang pagpatuman sa balaod samtang mapasayon ang tinabangay.

Giresolba usab sa mga komitiba ang pagmandu sa Bohol Provincial Environment Management Office (BPEMO) sa pagpahigayon og multi-sectoral coordination meeting sa PNP, the MARPSTA, ug PCG alang sa pagpabarug sa hiniusang kampanya pagpatuman sa balaod batok sa illegal nga panagat.

Gawas pa niana, giaghat usab sa konseho ang Provincial Cooperative Development Office (PCDO) aron magamhan ang mga Civil Society Organizations (CSOs), Non-Governmental Organizations (NGOs), ug People’s Organizations (POs) sa Malingin, Bien Unido, aron makakuhag pamuhunan ug mga serbisyo nga ilang kinahanglan gikan sa mga ahensya.

Sa katapusan, giaghat usab sa SP Committees ang Bureau of Fisheries and Aquatic Resources (BFAR) sa pagdesinyo og comprehensibo nga bansaybansay sa panginabuhian nga ipahaum sa panginahanglan sa mga taga Malingin.

Niini usab, si Gobernador Erico Aristotle Aumentado mipasabut nga dili niya kapasagdan ang mga buhat nga batok sa kinaiyahan, ilabi na kay ang pagguba sa kadagatan nasumpay sa kasegurohan sa pagkaon, panginabuhian ug ang paglahutay sa mga komunidad nga nagsalig niini dinhi sa Bohol. (PIAbohol)

DILI MAKAPASAGAD. Bisan pa kon ang gireklamo, gikan sa iya mismo nga Distrito, gipadayag ni Gob Erico Aristotle Aumentado nga dili niya kapasagdan ang illegal nga panagat kay ang pagguba sa kadagatan, naghulga sa seguridad sa panginabuhi-an, pagkaon u gang paglahutay sa mga katawhan nga nagsalig sa dagat. (PIABohol/PIMO)