73% sa kalungsuran dinhi sa

Bohol may Negosyo Centers

TAGBILARAN CITY, Bohol (PIA)— Katloan og lima (35) na ka Negosyo Centers o 73 porsyento na sa kinatibuk-an nga Bohol ang napabarug sa mga kalungsuran, gawas sa laing duha ang iya sa Department of Trade and Industry ug sa Kapitolyo.

Kini maoy kasayuran nga gipaambit sa DTI, human gibuksan ang Negosyo Center sa Cortes sa imaging buwan.

Ang pagpatukod sa mga Negosyo Centers maoy tubag sa kagamhanan sa panginahanglan nga katabangan ang mga micro, small ug medium enterprises (MSMEs) nga maoy nagpabuhi sa ekonomiya sa mga kalungsuran.

Ang pagpatunhay sa environment nga sayun makabarug ang negosyo maka-abag sa mga MSMS nga makigharung sa mga hagit nga ilang sagubangon ug pagsakay sa oportunidad nga mapun-an ang ilang ikapuhunan pa, dayag ni Bohol DTI Provincial Director Vierna Teresa Ligan.

Dala niini nga hagit, gipanghingusgan sa DTI ang Negosyo Center Program: kini nagmandu alang sa katukuran sa mga Negosyo Centers, nga maoy responsible sa pagpasulong sa kasayun sa pagpasugod og negosyo u gang pagbukas sa mga dalan alang sa mga serbisyo sa gobernor nga ikatanyag alang sa MSMEs.

Niadtong Hulyo 2014, napasa ang Republic Act No. 10644 o “An Act Promoting Job Generation and Inclusive Growth through the Development of Micro, Small, and Medium Enterprises” human kini mapirmahan sa Pangulo.

Giila nga “Go Negosyo Act,” kini gipanday aron mas mapadali pa ang nasudnong kaugmaran, lukop nga kalambuan ug napakunhoran nga kawad-on pinaagi sa pag-aghat sa mga MSME, ug kini na ang nagmandu sa katukoran sa mga Negosyo Centers sa mgalalawigan, syudad ug kalungsuran.

Sa mga natukod nga Negosyo Centers sa Bohol, kini na ang nagpahimutang aron mapaspas ang pagparehistro sa mga negosyo, pagkuha sa opisyal nga mga ngalan niini, pagtabang aron magamhan ang mga MSMEs sa pagtutok sa negosyo nga dili maalkanse, paghatag og mga tambag ug ang pagpabukas sa mga tinubdan sa dugang capital aron mas mapaugmad pa ang mga negosyo.

Dinhi sa Bohol, upat na lang ka lungsod sa Distrito 1, upat sa Distrito 2 ug unom ka lungsod sa Distrito 3 ang wala pa makatukod sa ilang kaugalingon nga negosyo centers, segun sa taho sa DTI. (PIABohol)

PUHUNAN POHON. Sa paglagda ni Mayor Rodrigo Dennis Uy sa kasabutan sa pagpabarug sa Negosyo Center sa Cortes, mahimong mabuksan usab ang dugang tinubdan sa puhunan sa mga gagmay nga mamumuhunan gawas pa sa abang nga ilang makuha gikan sa NC. (PIABohol)