DBM nipasidaan batok sa mga fixer sa bakak

nga mga pag-angkon sa pagproseso sa LGSF

TAGBILARAN CITY, Bohol (PIA)--Nipasidaan ang Department of Budget and Management (DBM) sa publiko batok sa mga indibidwal nga bakak nga nangangkon nga adunay koneksyon sa ilang Local Government and Regional Coordination Bureau (LGRCB) aron mapadali ang mga hangyo sa Local Government Support Fund (LGSF).

Ang LGSF usa ka alokasyon aron mahatagan og gahum ang mga local government units (LGUs) sa tibuok nasud.

Kini gituyo aron suportahan ang pagpatuman sa matag prayoridad nga programa ug proyekto sa LGU sulod sa ilang tagsa-tagsa ka hurisdiksyon ubos sa General Appropriations Act (GAA).

Sa usa ka advisory nga gipagawas adlaw’ng Martes, ang DBM nag-ingon nga nakadawat sila og mga taho sa mga indibidwal nga giingong naghatag sa ngalan sa LGRCB nga mga opisyal ug kawani samtang naghimo og bakak nga mga pag-angkon nga sila makatabang sa pagpadali sa pagpagawas o pag-apruba sa LGSF.

Ang DBM mi-klaro nga ang LGRCB dili makig-transaksyon pinaagi sa mga fixer o middlemen, nga nagpasiugda nga ang pagproseso sa mga hangyo sa LGSF dili pinaagi sa personal nga koneksyon o kaila sulod sa ahensya.

Gidugang usab niini nga ang pagpagawas sa LGSF moagi sa usa ka hingpit nga ebalwasyon ug proseso sa pag-apruba subay sa kasamtangan nga mga lagda ug regulasyon.

“The processing of LGSF requests is not coursed through personal connections or acquaintances within the LGRCB. The release of LGSF funds strictly undergoes a thorough evaluation and approval process,” matud pa sa gipagawas nga pahayag sa DBM.

Gitambagan sa DBM ang publiko, ilabina ang LGUs, nga makig-alayon lang pinaagi sa opisyal nga communication channels sa ahensya aron masiguro ang saktong impormasyon ug saktong pamaagi.

Alang sa mga lehitimong pangutana, ang publiko mahimong mokontak sa DBM Community Relations Office pinaagi sa opisyal nga email ug hotline niini. (ECB/PIA7-Bohol)