Send-off ceremony sa halos 2K security personnel

alang sa ASEAN Summit 2026, gipahigayon sa Bohol

TAGBILARAN CITY, Bohol (PIA)--Gipahigayon ang send-off ceremony sa kinatibuk-ang 1,717 ka security personnel sa Bohol niadtong Miyerkoles, Enero 14, isip pagpangandam sa Association of Southeast Asian Nations (ASEAN) Summit 2026.

Ang seremonyas nga gipahigayon sa lungsod sa Panglao nagpakita sa hingpit nga kaandam ug pinakataas nga lebel sa deployment sa mga personahe gikan sa Philippine National Police pinaagi sa Bohol Police Provincial Office (BPPO), inubanan sa reinforced forces gikan sa Bureau of Fire Protection (BFP), Philippine Coast Guard (PCG), Armed Forces of the Philippines (AFP), Provincial Disaster Risk Reduction and Management Office (PDRRMO), ug uban pang force multipliers.

Ang maong mga personahe gikatakdang i-assign alang sa round-the-clock operations sa tibuok probinsya sa Bohol, diin ang operasyon gisuportahan usab sa lain-laing mga land ug water asset aron masiguro ang paspas nga pagtubag, hapsay nga paglihok, ug epektibo nga koordinasyon sa tibuok probinsya.

Lakip sa mga ekipo nga giandam mao ang patrol ug high-speed response vessels, armored vehicles, fire trucks, ambulances, rescue vehicles, ug uban pang logistical transport units.

Sa iyang mensahe, si BPPO Provincial Director PCol Patricio C. Degay Jr. miingon nga ang kapolisan sa Bohol nagpabilin sa pasalig niini nga “service from the heart” partikular na sa umaabot nga ASEAN Summit nga ipahigayon sa Bohol.

Gidugang niini nga andam ang kapolisan sa pagmintinar sa seguridad sa probinsiya alang sa mas luwas ug malinawon nga kalihokan sa mga delegado sa ASEAN ug sa tibuok katawhan.

“We will ensure ASEAN delegates and visitors [to] depart Bohol with a lasting positive impression-one that embodies the warmth of the Filipino people and reflects the shared values of ASEAN solidarity,” matud pa ni Degay.

Karong tuiga, ang Bohol miduyog sa Manila, Cebu, Boracay, Laoag, Iloilo, Tagaytay, ug Clark isip host locations sa nagkalain-laing ASEAN meetings.

Una nang gipasalig ni Gob. Erico Aristotle Aumentado nga ang lalawigan sa Bohol naghimo sa tanang gikinahanglang pagpangandam dili lang alang sa luwas nga pag-host sa mga kalihokan kon dili aron ipakita usab ang talagsaong kultura ug turismo sa probinsiya ngadto sa mga bisitang delegado. (ECB/PIA7-Bohol)

Pormal nang gisugdan sa Bohol ang pagpangandam alang sa 2026 ASEAN Summit pinaagi sa joint blessing ug send-off ceremony alang sa mga security personnel ug operational assets niadtong Enero 14, sa Panglao Municipal Plaza sa lungsod sa Panglao. Ang maong kalihokan nagpasiugda sa kaandam sa probinsiya sa pagsiguro sa luwas ug hapsay nga pagpahigayon sa mga internasyonal nga meeting, nga mag-host sa mga delegado ug mga opisyal gikan sa tibuok rehiyon sa ASEAN. (hulagway sa PNP-Bohol)