Imbentaryo sa humay sa Bohol

igo sa 169 na lamang ka adlaw

TAGBILARAN CITY Bohol (PIA)— Aduna na lamay 169 ka adlaw nga supply sa bugas nga dinhi gi-ani sa Bohol alang sa mga Bol-anon, kini maoy gipadayag ni Assistant Provincial Agriculturist Larry Pamugas, didto sa tigum sa Provincial disaster and Risk Reductiona Management Council didto sa Capitol Ceremonial Hall.

Subay sa katapusang imbentaryo sa bugas humay niadtong Marso 15, 2026, adunay 96,824.21 metriko toneladas nga humay ang naani subay sa 47,244.49 ektaryas nga kahumayan nga natamnan, matud ni Pamugas

Ug sa gibanabana nga 3.49 metriko toneladas nga ani sa usa ka ektarya, naglantaw ang mga tinugyanan nga may 105,511.47 metriko toneladas nga nahipos sa katapusang ani, human sa 10 nga masayang ug sa 65 porsyento nga bugas human magaling, gipasabut ni Pamugas.

Apan, sa 1.6 ka milyon ka mga Bol-anon nga mokaon og bugas matag adlaw, aduna kini 447,283.23 kilograms nga konsumo, ug kon sumadahon, ang supply sa bugas igo na lamang sa 169 ka adlaw.

Sa 96, 824.21 metriko toneladas nga napagaling nga humay, ug sa konsumo, taman ra sa Oktubre 23 ang kasamtangan nga imbenyaryo, segun sa Asst agriculturist.

Tungod niini, kon mapakyas ang pagpananum ssa sundo nga ting-ani, may paglisud nga mahitabo butyag ni Pamugas.

Nunot niini, gipahibaw na usab sa PAG-ASA ang taas nga posibilidad nga matunong ang panagna nga magsugod sa Hunyo-Hulyo ug Agosto ang pagsulod sa El Nino, ug nga kini molapas pa nagdto sa unang kwarter sa 2027.

Subay usab niini, dala sa kakuwang sa tubig alang sa irigasyon tungod kay walay uwan, mahimong may dyutay lamang ang maani ug mahimong magkalisud ang suplay sa pagkaon. (PIAbohol)

GIPANGANDAMAN APAN DILI SARANG. Bisan pa nga regular na ang El Nino nga mobalik sa matag 2 ngadto sa 7 ka tuig, bisan pa og gipangandaman na kini, Makita pa gihapon nga kuwang gihapon ang pagseguro nga mapun-an ang mga pagkuwang nga nasinati kaniadto, ilabi na kay kining umaabut nga huwaw, mahimong mas grabe pa kay sa nasinati, matud ni Asst Provincial Agriculturist Laar Pamugas. (PIAbohol)