P3.9M nga donasyon gigamit

pagpahiuli sa Marcos Bridge

TAGBILARAN CITY Bohol (PIA)— Kon mahuman na ang proyekto, mabalanse na ang nahibilin nga P3.9 milyones nga donasyon Earthquake Recovery and Rehabilitation Plan (ERRP), kini maoy kasayuran nga nabutyag didto sa labing bag-o nga tigum sa Provincial Disaster and Risk Reduction Management Council sa mi-aging semana.

Kahinumduman nga human sa labing kusog nga linog nga nasinati sa Bohol niadtong 2013, may mga nangabut nga mga donasyon alang sa ERRP, kasagaran niini nagamit na gawas sa P3,959,059 nga wala na maapil sa pagpahat alang sa rehabilitasyon.

Niining bag-o, sanglit ang tulay sa Marcos Bridge sa Sevilla usa man sa mga pasilidad nga naapektohan niadtong nahisgutan nga linog, nahukman sa lalawigan nga adto gamiton ang nahibilin nga pundo sa pagpahiuli sa nasampit nga impporastraktura.

Ang Marcos Bridge nagsumpay sa Sevilla ngadto sa Hanopol ug Balilihan nahimutang sa Lagtangan sa Sevilla.

Kahinumduman nga niadton 2013, dihang napalumpag sa linog ang mga dagkong imprastraktura sa Bohol, wala mapihig ang tulay sa Sevilla, kang kinsang approaches nangalaka ug kang kinsang pundasyon, naapektohan sa tay-og.

Hinuon, ang tulay nagpadayon nga gigamit sa mga sakyanan ug katawhan hangtud karon.

Apan, sa nagkadagko nga mga sakyanan nga molabang sa tulay, dili na mahimong pasagdan na lang usab ang apektado nga pasilidad.

Giduso sa bidding gamit ang P3.9 milyones nga pundo, ang pagpahiuli sa Marcos Bridge anaa na sa 15%, segun sa Provincial Engineers Office sa Bohol.

Hinuon, kasamtangan pa usab nga gipaagi-an pa ang tulay bisan sa nagpadayon nga pagpahiuli niini.

Kini ikatugyan na og balik, kon matibawas na ang pagpa-implementar sa nasampit nga pundo ug hingpit na nga mawala kay nagasto na ang donasyon niadtog 2013. (PIABohol).

P3.9M DONASYON SA LINOG GIGAMIT SA TULAY