ATI-7 modawat na og mga aplikante alang sa

2027 Int’l Internship Programs sa Japan ug Taiwan

TAGBILARAN CITY, Bohol (PIA)—Ang Agricultural Training Institute (ATI) Central Visayas modawat na karon og mga aplikasyon alang sa 2027 International Internship Programs (IIP) alang sa Japan ug Taiwan.

Ang IIP usa ka partnership tali sa Department of Agriculture, Japan Agricultural Exchange Council (JAEC), ug Manila Economic and Cultural Office (MECO) Taiwan.

Tumong niini nga bansayon ​​ang mga kwalipikadong batan-ong mag-uuma nga Pilipino aron mahimong mga lider ug mga negosyante sa agrikultura nga adunay igong katakos, pinaagi sa 11 ka bulan nga internship.

Ang iskedyul sa proseso sa pagpang-recruit mao ang mosunod: Agosto 14, 2026-kataposang adlaw sa pag-apply; Setyembre 7, 2026-sabay nga mga eksaminasyon sa probinsya; ug Setyembre 14 taman Oktubre 15, 2026-Field validation.

Ang mga interesado nga aplikante gi-awhag nga makig-alayon sa ilang tagsa-tagsa ka Municipal o City Agriculture Office ubos sa ilang Local Government Unit (LGU) alang sa endorsement ug dugang pangutana bahin sa programa.

Ang mga kwalipikasyon naglakip sa mga batan-ong Pilipinong mag-uuma nga nag-edad og 21 hangtod 30 anyos (alang sa YFFLTPJ) ug 21 hangtod 35 anyos (alang sa FYIPTaiwan); ulitawo o dalaga; walay kapuyo (live-in partner); dili mabdos (alang sa mga babayeng intern); ug walay anak sa panahon sa aplikasyon.

Kinahanglang anak sa mag-uuma o mangingisda; adunay labing menos 2 ka tuig nga praktikal nga kasinatian sa pagpanguma (human makagradwar sa high school o kolehiyo) sa panahon sa aplikasyon; ug adunay yuta nga pang-agrikultura, bisan unsa pa ang gidak-on o kahimtang sa pagpanag-iya niini.

Sa out-of-school youth, kinahanglang adunay High School Diploma (Old Curriculum), Senior High School Diploma (K-12), o gradwado sa kolehiyo (bisan unsang kursong may kalabotan sa agrikultura o teknikal/bokasyonal nga kurso).

Kinahanglan usab nga adunay maayong reputasyon sa komunidad ug/o maayong pamatasan nga gipamatud-an sa ilang Barangay Chairman, adunay maayong kahanas sa komunikasyon nga gipamatud-an sa ilang Local Government Unit (LGU).

Kinahanglang walay relasyon (pinaagi sa kasal o dugo) ngadto sa bisan kinsang empleyado sa ATI hangtod sa ikatulo nga ang-ang sa kadugo (3rd degree of consanguinity/affinity), nga gipamatud-an sa Regional Screening Committee, walay igsoon nga nakadawat na o kasamtangang nakadawat sa maong programa (gawas kung walay laing mga partisipante), walay mga obligasyon nga wala pa mabayri o nalangan (overdue) sa ATI sa panahon sa aplikasyon, ug dili benepisyaryo sa ubang International Internship Programs sa ATI ug walay nangaging biyahe sa gawas sa nasod nga may kalabotan sa maong mga programa (IIPs).

Alang sa YFFLTPJ: sertipiko gikan sa doktor nga nagpamatuod nga walay tattoo ug/o piercing sa bisan asang parte sa lawas (ang piercing sa dalunggan gitugot lamang alang sa mga babaye); ug nakapasar sa mosunod nga medical examination/tests sa regional level (gipahigayon sa mga diagnostic clinic, ospital, o laboratoryo nga akreditado sa Department of Health o DOH), diin ang tanang resulta sa laboratoryo ug medical certificate nagpakita sa remark nga “FIT TO WORK,” sama sa mosunod: Regional Medical Examination: a. Chest x-ray alang sa tuberculosis; b. Stool examination alang sa mga parasite; c. Serological test alang sa syphilis; ug d. Drug Test National Medical Examination: Pregnancy test; oral/dental test; Eye Examination; ECG test; mga pagsulay sa neuro-psychology ug sertipikasyon gikan sa medikal nga eksperto nga nagpamatuod nga walay kasaysayan sa bisan unsang sakit sa pangisip.

Ang application forms ma-download sa https://tinyurl.com/IIPRegion7RevisedForms samtang ang mga checklist makita sa https://tinyurl.com/4csc8uyn. (ECB/PIA-7 Bohol)

Ang IIP usa ka partnership tali sa Department of Agriculture, Japan Agricultural Exchange Council (JAEC), ug Manila Economic and Cultural Office (MECO) Taiwan. Tumong niini nga bansayon ​​ang mga kwalipikadong batan-ong mag-uuma nga Pilipino aron mahimong mga lider ug mga negosyante sa agrikultura nga adunay igong katakos, pinaagi sa 11 ka bulan nga internship. (ATI-7)