Online appointment system sa MARINA gipalapdan,

340 slots gibuksan alang sa mga seafarer pinaagi 

sa smart automation

TAGBILARAN CITY, Bohol (PIA)—Isip kabahin sa usa ka dakong lakang aron mamenosan ang oras sa paghulat ug madugangan ang gidaghanon sa mga bakanteng slot, gipatuman sa Maritime Industry Authority (MARINA) ang usa ka importanteng update sa sistema sa ilang online booking platform.

Kini magdugang og hangtod sa 340 ka appointment slots matag adlaw alang sa mga seafarer sa tibuok nasod.

Gitubag niini nga update ang dugay na nga problema sa inefficiency sa Seafarer’s Record Book (SRB) ug Seafarer’s Identity Document (SID) Online Appointment System (OAS) nga kabahin sa eGovPH mobile application.

Kaniadto, kung ang usa ka seafarer nga adunay regular nga appointment mopili sa expedited processing (mas paspas nga proseso), ang ilang orihinal nga regular nga slot masayang og dili magamit.

Ubos sa bag-ong gipatuman nga kausaban, ang sistema awtomatiko ug dihadiha nga ibalik kini nga mga bakanteng regular slot ngadto sa kinatibuk-ang listahan sa mga available nga slot.

Kini nga awtomatikong proseso makapugong sa pag-expire sa mga wala magamit nga schedule ug makapahimo sa mga processing center sa tibuok nasod nga mapadako ang ilang kapasidad, nga maghatag sa mga seafarer og mas dakong kahigayonan nga makuha ang ilang gusto nga petsa.

Giklaro sa MARINA nga kini nga mga bag-ong nabakante nga slot makita lamang human malampusong maproseso ang expedited appointment sa laing seafarer.

Tungod kay padayon kining mga transaksyon sa tibuok adlaw, ang mga dugang nga slot makita ug mahimong available sa eGovPH app sa nagkalain-laing oras.

Gi-awhag sa MARINA ang mga seafarer nga kanunay’ng susihon ang app, samtang ang ahensya nagpadayon sa ilang pasalig sa paggamit og mga digital nga solusyon aron mapahapsay ang proseso sa pagkuha og lisensya ug dokumento alang sa mahinungdanong mga trabahante sa maritime sector sa nasod. (ECB/PIA-7 Bohol)

Gipahibalo sa MARINA ang malampusong gidugang nga bag-ong feature sa Seafarer’s Record Book (SRB) ug Seafarer’s Identity Document (SID) Online Appointment System (OAS) sa eGovPH App aron madugangan ang gidaghanon sa mga slot sa tanang processing center sa tibuok nasod. (MARINA)